إنتهى عهد الفســــــاد
إنتهى عهد الفســــــاد *** والضمير هو اللى ساد
وانتهى حكم الفراعنه *** والبطــــاله والكســــاد
لما فرعوننــــا الاخير *** يترمى بره البـــــــلاد
لما حاكمـــــنا الخطير *** يبقى مسخه للعبــــــاد
لما ميدان التحــــــرٌّرْ *** يحتشـــــــد فيه الولاد
كل شاب وكل شابـــه *** وكل مصرى فى اتحاد
لجل مايعلن ظالمنــــا *** إنٌّه يخسر فى العنـــاد
ليه ياجيش النصر لسِّه *** لسِّه واقف ع الحيـــاد
ليه بتتركهم يحاربـــوا *** بالقنابل والبنادق والجياد
بص لأختك بص لأمك *** وام احمد او سعـــــــاد
واحمى بنتك واحمى عمك *** واحمى ثوره فى الميلاد
هاتلى قائد باع لأمِّــــه *** ولا طارق خان زيـــاد
ياللا نكشف عنا غمِّـــه *** ياللا نطرد فى الفســاد
عقده اتنيـــــن تلاته *** واحنا فى الشحاتــــه
تلاتين عام يا سادى *** وانا مش لاقى سباته
تحمينى أنا وولادى *** والأمن خيـال مآتــــه
والثوره بتنـــــــادى *** من غير اى شماتــه
ارحل عن بـــــلادى *** ياللي انت فى التباته
مش عاوزين ع الشاشه *** اى وشوش غشاشه
تضحك واحنا بنبكـــــــى *** وتقـابـــلك ببشــاشه
تحكى زى ماتحكـــــــــى *** بس بأمر البــــــاشا
انا كاره اشكــــــــــــالكم *** تظهرلنا ع الشاشـه
علشان كل كلامكـــــــــم *** وصوركـــم بكِّاشــه
اما وزير اعلامكــــــــــم *** خدام تحــت الباشـا
ومصيره قـدامكـــــــــــم *** للإنعاش لو عاشـا
مش عاوزين مواضيــع *** لمذيعه ومزيـــــــع
لما الحق يضيــــــــــــع *** على ايد الجرابيـــع
يبقى الغش فظيــــــــــع *** اخطر من التطبيــع
مش محتاجه بديــــــهه *** مصر مالكش فيـها
خلصنا واتريــــــــــــها *** وارحل عن ارضيها
ظلمك لسه ماليهـــــــــا *** ودمائنا بترويـــــها
كلمات الشاعر / أحمد عبد الحميد عبد الجواد / 0125551698
شاعر الفقراء والمظلوميين
فني أول المعامل – كلية التعليم الصناعي بالسويس
تحية وإهداء لشباب الثورة في ميدان التحرير
والشهداء من أجلها في كل مصر
عِرْفِتْ مصر ثورة
عاشت مصر حرة
*********
ثورتنا بدم جديــــــــد *** وشجاعة بقلب حديــد
وشباب له عزم شديد *** يحمينا من التهديــــــد
نازل علشان يساعدنا *** ويحط الإيد فى الإِيــــد
يتكلم عن مواجعنـــــا *** ببراعه وشكـل فريـــد
والفقر اللى بيوجعــنا *** ويَّـاه ح يروح لبعيــــد
ودى ثوره جـوة بلدنا *** تتمتـع بالتأييــــــــــــد
راح تنجح لجل ولادنا *** وبلدنا تبقى فى عيـــد
يابلدنا الحلم إتحقــــق *** وبقالنا فجـر جديــــــد
وشبابنا هوا الأصدق *** والصبح ح ييجى أكيد
ياسويسنا ياأحلى مدينه *** فيه ثوره وعزم شديد
راح تمسح دمعه حزينه *** عن شطِّك بالتحديـــــد
وتزوق فيكى المينـــــــا *** وتعمر بالتشييـــــــــد
وتمد الكوبري لسينـــــا *** والخير فى بلدنا يزيـد
والصحرا اللى حوليـــنا *** ح تخَضَّر بالتسميــــد
والثوره ح تنجح بينــــا *** والكل ح يبقى سعيـد
والجيل الصاعد فيــــــنا *** ح يغنى ليها نشيـــــد
الثــــورة قامـت لينــــــا *** ورواها ألف شهيــــد
ثورتنــــــــا ح تنجيــــنا *** وح نبدأ فى التجديــد
والضلمه اللى فى ليالينا *** تنزاح من دم جديـــد
تنزاح من دم جديـــد
******
كلمات الشاعر / أحمد عبد الحميد عبد الجواد / 0125551698
شاعر الفقراء والمظلوميين
فني أول المعامل – كلية التعليم الصناعي بالسويس
الإثنين فبراير 21, 2011 2:15 pm
